Gassco - Kårstø - oppfølging av overflateprogram og aldring, inkludert storulykketilsyn

Mål og strategiar

Beskrivelse

Manglande samsvar mellom kortsiktige og langsiktige mål og strategiar i overflateprosjektet på Kårstø.

Begrunnelse

Vi har i tilsynet blitt informert om arbeidet som ligg i overflateprosjektet på Kårstø og vi fekk ein oversikt over ei rekke oppfølgingsaktivitetar i perioden 2016-2018 som Gassco har gjennomført med Equinor relatert til inspeksjon, degradering og overflaterehabilitering.

Barrieren / ytelseindikatoren for å hindre lekkasje (PS01 – containment) har over fleire år hatt degraderingar som har medført ein karakter D. Vi vart i tilsynet informert om planar tilbake til rundt 2018/2019 der det var mål om å forbetre tilstanden for denne indikatoren i 2023/2024. Desse tidlegare planane har blitt påverka av faktorar som blant anna pandemi og krig i Europa i tillegg til tilgang på kompetent personell, men allereie før pandemien var det indikasjonar på eit visst etterslep i gjennomføringa. Det vart og avdekka at tidlegare vurderingar om at spesifikke isoleringstypar ikkje utgjorde ein stor risiko for korrosjon under isolasjon har vist seg å ikkje stemme. Dette har og medført eit auka inspeksjons- og rehabiliteringsomfang. I Gassco si oppfølging frå januar 2022 påpeikte dei manglande realistiske planar om å betre karakteren på PS01 frå D til C der det no var informert om eit mål om å oppnå dette i 2026. Informasjon i tilsynet vårt antyda at dette heller ikkje var eit realistisk mål.

Informasjon frå presentasjonar og månadsrapport for ISO-prosjektet frå oktober 2022 viser at ein er på etterskot med gjennomføringa av planlagd program for 2022. I henhold til årshjul i dokumentet ‘Feilhåndteringsstrategi for overflatevedlikehold for Kårstø anlegget, revisjon 2, gyldig frå 16.6.2020, revidert 20.9.2021’ (draft), så skulle planlegging og estimering av arbeidsomfang for 2023 vere klart i løpet av tredje kvartal 2022. Ut i frå informasjon i tilsynet så var ikkje dette klart på tilsynstidspunktet og det er identifisert ei betydeleg mengd med arbeid i programmet som skal overførast frå 2022 til 2023. Oversikt over planlagd budsjett for perioden 2020-2023 viser at det er avsett likt beløp kvart år. Det har over fleire år vore eit underforbruk og det viser seg at ein har mindre gjennomføringsevne for same beløp dei seinare åra.

Ut i frå det vi har gått gjennom i tilsynet så meiner vi at Equinor ikkje i tilstrekkeleg grad føl interne planprosessar og at planar ikkje er realistiske med omsyn på gjennomføring. I tillegg er ikkje  dei rette tiltaka  sett inn for å gjennomføre nødvendige inspeksjons- og rehabiliteringsaktivitetar i ISO-prosjektet i samsvar med planar.

Hjemmel

• Styringsforskriften § 7 - Mål og strategier

  (sist endret: 01.01.2011)