Petroleumabearráigeahčču ovttasbargá Stáhta nuoskkidanbearráigeahčuin (SFT) ja Stáhta dearvvašvuođabearráigeahčuin (HTil) das movt ollislaččat muddet petroleumadoaimma norgga oljo- ja gásaguovlluin. Petroleumabearráigeahčču jođiha dán ovttasbarggu.
- Mii árvvoštallat fitnodagaid plánaid Barentsábi petroleumadoibmii ovttas eará guoski eiseváldin. Fitnodagat galget duođaštit ahte sii nagodit ollášuhttit láhkagáibádusaid dearvvašvuođa, birrasa ja dorvvolašvuođa ektui, deattuha petroleumabearráigeahču direktevra, Magne Ognedal.
Oktasaš DBD-njuolggadusat
Petroleumadoaimma DBD-njuolggadusat leat doaibmi hábmejuvvon. Dat mearkkaša ahte go eiseválddit gáibidit dohkálaš dearvvašvuođa, biras ja dorvvolašvuođa dási de leat seammalágan gáibádusat olles petroleumadoaibmi norgga bohkanguovlluin.
Eiseválddiin lea riskadárkkisteaddji lahkaneapmi petroleumadoibmii. Danin go sávvameahttun dáhpáhusain leat stuorit váikkuhusat davviguovlluin go muđui norgga bohkanguovlluin, ferte ealáhus iežas plánemis duođaštit riskageahpideaddji doaimmaid mat dán dili vuhtiiváldet.
Barentsábi dovdomearkkat leat ea.ea. guhkes gaskkat, váilevaš siskkáldas struktuvrrat, skábmaáigi ja garra dálkkádat. Dát mearkkaša ahte fitnodagat berrejit válljet rusttegiid, dávviriid, buvttadanvugiid, stivrenvuogádagaid, eastagiid ja gearggusvuođa mat sáhttet dan buhtadit.
Fitnodagaid leat earenoamážiid gohččon vuhtiiváldit davviguovllu birrasa- ja guolástanberoštumiid. Earret eará eaktuda Ráđđehus ahte buot petroleumadoaimmain Barentsábis galgá vuolggasadjin leat ahte ii obage galgga leat nuoskkideapmi luoittu bakte áhpái dábálaš bovren- ja gáivodoaimmain. Spiehkastahkan leat bovrenbázahusat ja bovrengolgosat bovrenráiggi bajimusas oasis, man dábálaččat sáhttá luoitit mearabodnái.
- Dát lea bealit mat gáibidit earenoamáš fuomášumi go eiseválddit meannudit ohcamušaid main lea sáhka álggahit doaimma Barentsábis, deattuha Magne Ognedal.
Ohcamušat birasduođaštusa gáibádusaid hárrái
Stáhta nuoskkidanbearráigeahčču (SFT) čuovvu nuoskkidanlága, ja gieđahallá dokumeanttaid mat gusket njuolggadusaid olggut biras-gáibábdusaide, dás luoitinohcamušaid ja fitnodagaid birasriska guorahallama ja gearggusvuođa /oljodustehusa ohcandoaimma oktavuođas.
SFT sádde birasduođašteami gulaskuddamii, sullii gávcci vahkku gulaskuddanáigemeriin. SFT einnosta atnimis 13 vahkku gieđahallat ášši, ja vejolaš váidagiin dat sáhttá guhkut Birasgáhttendepartemeanta gieđahallama vuođul.
Ovttastahtton mearrádusat
Ovddasvástideaddji eiseválddit – Petroleumabearráigeahčču, Stáhta nuoskkidanbearráigeahčču ja Dearvvašvuođabearráigeahčču gieđahallet iešguđet osiid miehtanohcamušas, oktan guoskevaš dokumeanttaiguin /ohcamušaiguin, sin ovddasvástádussuorggi ektui.
Lobi juolluda petroleumabearráigeahčču, geas lea bálddalastin rolla eará eiseválddit ektui.
